Ապրիլի 30-ին Փորձաքննությունների ազգային բյուրոյում հյուրընկալվել էին ՀՀ ԳԱԱ ԳԿՄԿ «Կլինիկական հոգեբանություն և հոգեթերապիա» մասնագիտության մագիստրանտները։
Այցի նպատակն էր ուսանողներին մոտիկից ծանոթացնել հոգեբանական փորձաքննությունների կազմակերպման առանձնահատկություններին, ինչպես նաև ներկայացնել Բյուրոյում պրակտիկա անցնելու և մասնագիտական կարիերա սկսելու հեռանկարները։
Հյուրերին դիմավորեցին Բյուրոյի տնօրենի գիտության գծով տեղակալ Պատվական Ոսկանյանը, Հոգեբանական փորձաքննությունների բաժնի պետ, պրոֆեսոր Ռուբեն Աղուզումցյանը և Ուսուցման ու որակավորման կենտրոնի պետ Մարինե Սերոբյանը։
Հանդիպման ընթացքում Պատվական Ոսկանյանը ներկայացրեց Բյուրոյի գործունեության հիմնական ուղղությունները, գիտամեթոդական բազան և միջազգային համագործակցության կապերը՝ ընդգծելով, որ կառույցը մեծապես կարևորում է գիտական և կրթական հաստատությունների հետ կապերի ամրապնդումը։ Նա հավելեց, որ Բյուրոն բաց է համագործակցության համար և պատրաստ է ուսանողներին ապահովել անհրաժեշտ գործնական հմտություններով, ինչպես նաև ստեղծել անհրաժեշտ հենք՝ փորձագիտական ոլորտում նրանց հետագա մասնագիտացման համար:
Այնուհետև պրոֆեսոր Ռ. Աղուզումցյանը հանդես եկավ դասախոսությամբ՝ անդրադառնալով հոգեբան-փորձագետի դերին, աշխատանքային առանձնահատկություններին և հոգեբան-փորձագետների պատրաստման գործընթացին՝ ընդգծելով մասնագիտական որակավորման և գործնական հմտությունների ձեռքբերման անհրաժեշտությունը։ Նա մասնագիտական խորությամբ վերլուծեց փորձագետի աշխատանքի մեթոդաբանությունը՝ այդ ամենը դիտարկելով Հայաստանում հոգեբանության՝ որպես գիտության կայացման և զարգացման համատեքստում։
Հանդիպումն անցավ ակտիվ քննարկումների և հարցուպատասխանի մթնոլորտում։ 
Փորձաքննությունների ազգային բյուրո» ՊՈԱԿ-ը մշտապես կարևորում է բուհական և հետբուհական կրթության որակյալ իրականացման և բարձր մասնագիտական գիտելիքներով և գործնական հմտություններով օժտված մասնագետների պատրաստման գործընթացում արդյունավետ փոխգործակցության իրականացումը՝ պատրաստակամ լինելով աջակցել դատական փորձաքննությունների ոլորտով հետաքրքրված բուհերի ուսանողների որակյալ կրթության իրականացմանը։ 

06 May 2026